ក្រមសីលធម៌វេជ្ជសាស្ត្រ ត្រូវបានបង្កើតឡើង និងត្រូវបានគោរពយ៉ាងខ្ជាប់ខ្ជួនដើម្បីឱ្យអតិថិជនទទួលបានអត្ថប្រយោជន៍។ ក្នុងនាមជាបុគ្គលិកនៃមន្ទីរសម្រាកព្យាបាលកម្ពុជា វេជ្ជបណ្ឌិតត្រូវទទួលខុសត្រូវចំពោះអតិថិជន សង្គម បុគ្គលិកសុខាភិបាលផ្សេងទៀត និងខ្លួនឯង។ គោលការណ៍ខាងក្រោមត្រូវបានបង្កើតឡើងដោយមន្ទីរសម្រាកព្យាបាលកម្ពុជា។ គោលការណ៍ទាំងនេះមិនមែនជាច្បាប់ទេ តែជាបទដ្ឋានសីលធម៌នៃអាកប្បកិរិយារបស់គ្រូពេទ្យ។ គ្រូពេទ្យគ្រប់រូប ត្រូវប្តេជ្ញាចិត្តខ្ពស់ក្នុងការផ្តល់ការថែទាំសុខភាព ប្រកបដោយសមត្ថភាព និងមេត្តាធម៌ ព្រមទាំងគោរពសេចក្តីថ្លៃថ្នូរ និងសិទ្ធិមនុស្ស។ គ្រូពេទ្យគ្រប់រូប ត្រូវប្រកាន់ខ្ជាប់នូវបទដ្ឋានវិជ្ជាជីវៈ ភាពស្មោះត្រង់ក្នុងទំនាក់ទំនងប្រកបដោយវិជ្ជាជីវៈ និងត្រូវរាយការណ៍ជូនដល់ប្រធានមន្ទីរពេទ្យអំពីអាកប្បកិរិយាមិនសមរម្យ អសមត្ថភាព ឬការចូលរួមក្នុងការលួចបន្លំ ឬការបោកប្រាស់ផ្សេងៗរបស់គ្រូពេទ្យផ្សេងទៀត។ គ្រូពេទ្យគ្រប់រូប ត្រូវតែគោរពសិទ្ធិរបស់អតិថិជន សហការី និងបុគ្គលិកវេជ្ជសាស្ត្រផ្សេងទៀត ហើយត្រូវរក្សាការសម្ងាត់ និងឯកជនភាពរបស់អតិថិជន។ គ្រូពេទ្យគ្រប់រូប ត្រូវតែបន្តសិក្សា អនុវត្ត និងបង្កើនចំណេះដឹងវិទ្យាសាស្ត្រ ព្រមទាំងរក្សាការប្តេជ្ញាចិត្តខ្ពស់ក្នុងការអប់រំសុខភាព ផ្តល់ព័ត៌មានដែលអតិថិជន សហការី និងសាធារណជនត្រូវការ ទទួលការពិគ្រោះយោបល់ និងធ្វើតាមការណែនាំរបស់បុគ្គលិក សុខាភិបាលផ្សេងៗទៀតដែលមានចំណេះដឹងច្រើនជាងខ្លួន។ គ្រូពេទ្យគ្រប់រូបមានសិទ្ធិជ្រើសរើសអតិថិជន សហការី និងបរិយាកាសដែលស័ក្តិសមសម្រាប់ការផ្តល់សេវាវេជ្ជសាស្ត្រដល់អតិថិជន(លើកលែងក្នុងករណីសង្គ្រោះបន្ទាន់)។ គ្រូពេទ្យគ្រប់រូបត្រូវចូលរួមនៅក្នុងសកម្មភាពកែលម្អមន្ទីរសម្រាកព្យាបាលកម្ពុជា និងសុខភាពសាធារណៈ។ គ្រូពេទ្យគ្រប់រូបត្រូវមានការទទួលខុសត្រូវខ្ពស់ក្នុងការព្យាបាលអតិថិជន។ គ្រូពេទ្យគ្រប់រូបត្រូវគាំទ្រការទទួលបានការថែទាំសុខភាពសម្រាប់មនុស្សគ្រប់រូប។